[郁民開箱] 實測Merrell Moab FST_01真正愛行山嘅人,都對行山鞋有一定要求,而我作為身型有返咁上下嘅山友,當然更加揀擇。所以,當知道有機會試下Merrell好出名嘅Moab系列第二代,我二話不說就應承咗。

以下係Moab嘅官方介紹:

「新一代Moab FST採用更強抓地力的VIBRAM® Megagrip大底;配合Merrell專屬鞋跟軟墊,行走崎嶇山勢能同時保持舒適及穩定。全新Moab FST 利用3D打印技術,減輕鞋身重量;進階的設計,更令鞋身顯得更修長,增添時尚感。」

好,廣告時間到此為止! 以上嘅描述,相信大部份人睇完都會化身金魚,唔使7秒就忘記咗。所以我喺度都盡返責任,記錄成個試鞋過程,睇下大家有無用啦!

[郁民開箱] 實測Merrell Moab FST_02開箱[郁民開箱] 實測Merrell Moab FST_04顏色/外型:必須承認,我係一個膚淺嘅人,買鞋睇款先過睇功能,所以一直對Merrell唔係好有感覺,但係近年佢哋出品明顯型咗、靚咗,的確加返唔少分。雖然個人比較鍾意黑色,但呢對藍灰色配搭,沉實得嚟都OK。


[郁民開箱] 實測Merrell Moab FST_03鞋身:就算係新鞋,第一次著落腳都唔算硬,可能有人會話唔夠保護,但我又覺得唔錯。尤其係,自己本身腳掌較闊,著日本嗰啲窄身跑鞋會腳痛,所以特別鍾情美國品牌。之不過咁,官方資料話呢對正常版外,美國仲有對Wide Width版,乜佢哋對腳真係有咁闊咩?[郁民開箱] 實測Merrell Moab FST_05鞋底:終於都嚟到我最期待嘅畫面了! 十年前第一次著過Vibram底運動鞋,已經做咗佢fans,所以話我偏心都好,呢對Moab FST用Vibram Megagrip底,簡直係令我興奮。同鞋身一樣,第一次試著都唔覺鞋底硬,但實際係點,真係要上過山先知。Anyway,講多無謂,出發!

實測

[郁民開箱] 實測Merrell Moab FST_06古語有云:「行山先嚟落雨,唔通個天都唔鍾意我?」唔單止咁,仲要試新鞋嗰朝先嚟橫風橫雨,睇嚟上天真係好想我試真佢。今次嘅路線係鳳凰徑第三段,亦即係由伯公坳上鳳頂再落昂坪,貪佢有上有落有石屎有泥路,路程又唔算長,可惜當日極之大霧,能見度10米可能都無,所以乜景都睇唔到,可以專心試鞋。

[郁民開箱] 實測Merrell Moab FST_08

[郁民開箱] 實測Merrell Moab FST_10老老實實,正如上面所講,論保護同承托Moab FST未必係最強,但講到舒適感,第一次著上山都無「新鞋落地」嘅感覺,鞋底厚得嚟唔硬,呢樣已經好易「入口」。而最重要嘅係,就算當日濕度奇高,朝早又落完雨,踩上泥瓣濕地都唔覺跣,至於石頭上面嗰啲青苔……都係留返俾專業人士去試啦。

[郁民開箱] 實測Merrell Moab FST_07

整體嚟講,我覺得呢對Moab FST幾適合行山新手,又或者參加戶外活動/郊遊時去著,如果玩長途越野跑呢啲,就真係未必100%合適。重要嘅嘢講多次,Vibram Megagrip鞋底始終係我最欣賞嘅地方,而今次亦無令我失望。

[郁民開箱] 實測Merrell Moab FST_09

後記
因為呢份「功課」,喺網上睇咗唔少Merrell品牌歷史,除咗發現佢同我一樣咁大(1981年創立),原來創辦人之一嘅Randy Merrell,當初係造牛仔靴(Cowboy boots)起家,之後轉戰手造行山鞋(hand-made hiking boots),成名後再被另外兩位創辦人睇中,先至一齊創立Merrell。以下最後呢幅相,就係Randy當年成名之作,再諗返而家Moab FST已經用到3D打印技術,呢幾十年嘅發展真係好驚人。隨住3D打印越嚟越普及,未來幾年嘅行山鞋運動鞋,相信仲有唔少大改變大進步。

[郁民開箱] 實測Merrell Moab FST_11

產品由Merrell提供

馬拉松Marathon分店獨家率先發售

更多:
Fitz.hk Facebook專頁
[郁民開箱] MONSTER x adidas Adistar 藍牙無線運動耳機
Fitz Gear 裝備

廣告