咩話? 穴位都有名店咁攪笑?

非也,個穴位叫曲池,唔係叫「Cool池」,哈哈哈!

曲池

又名鬼臣、陽澤。又係「鬼系列」嘅穴位,皆因曲池係「十三鬼穴」之一,不多解釋。

點解叫曲池?
曲,有屈曲之意。因為取穴時,係要屈曲手肘嘅,而呢個穴位係大腸經合穴,意思係脈氣流注匯合的位置,好似水注入池咁。


曲池有幾好用?
就係曲池係大腸經嘅穴位,筆者會咁樣理解:大腸有份負責排出便便,亦係人體排毒方法之一,透過刺激曲池,可以隨著便便帶走人體濕滯重濁之氣,變左「直腸直肚」!

曲池,確實係一個「痾 in One」好用的穴位,讚!

點解叫陽澤?
陽,有氣的意思,況且呢個穴位係屬於手陽明大腸經,即係陽經穴位;

澤,為聚集水流的地方。因此,可理解呢個穴位含有豐富水濕的物質,筆者所以認為,刺激陽澤穴可以利水除濕咁解囉! 大家都知道,香港地好多人都好濕架啦!

OK,大家睇下面幅圖就會搵到自己手上嗰兩個「Cool池」架啦~

血海

一提起呢個穴位,就會有病人問筆者:「有血海,咁有冇深仇呢? 哈哈哈!」

嗯……深仇穴就冇架啦,氣海穴就有嘅,都係一個幾好用嘅補益穴位,遲D筆者再介紹氣海穴啦~

點解叫血海?
中醫認為,脾為後天之本,氣血生化之源,呢個穴位為脾經脈氣所發,為脾血歸聚之海,且善治血分病証,故稱為血海。

呢個穴位可以用來治療各種婦科疾患,可謂用途較多,例如:月經不調,痛經,閉經,崩漏,經期腹脹等。姊妹們,認住血海啦!

一個反手取血海
自己點搵血海? so 簡單呢:

正坐屈膝,將手掌放在對側膝蓋骨(菠蘿蓋)上(即係右手取左側血海;左手取右側血海),掌心對準膝蓋骨頂端,拇指向內側,血海就係喺拇指尖所指嘅位置啦。

就在這個位置:

曲池+血海=慢性蕁麻疹穴位良方

蕁麻疹,俗稱「風癩」,中醫有云「風性善行數變」,風團驟起驟散,發作部位游走不固定,而且痕癢非常,有病人痕到成晚冇得訓。筆者臨床上都會常用呢對穴位,效果不錯,而且疹毒可從大便而解。

當然,治療時亦要配合中藥以收更好的效果啦!

曲池 & 血海

曲池 血海
位置 在肘橫紋外側端,屈肘時,在肱骨外上髁與肘橫紋的連線中點 屈膝時,在大腿內側,髕底(俗稱「菠蘿蓋」)內側端上2寸,在股四頭肌內側頭的隆起處
所屬經絡 大腸經 脾經
備註 合穴,十三鬼穴 脾血歸聚之海,善治血分病証
功效 疏風解表,清熱退熱,調和氣血,通經活絡,利水除濕 袪風清熱,調和氣血
主治 風疹,蕁麻疹諸症
痹証痛症,久病入絡者

*米奇醫師為執業女中醫師

原文載於 澤聲中醫


更多:
Fitz Facebook專頁
[米奇中醫堂] 穴來穴對: 人體穴位有咁多,點先記得晒? (醒腦開竅人中與合谷)
[米奇中醫堂] 醫食同源:杏仁
[米奇中醫堂] 醫食同源:雪耳
[米奇中醫堂] 口瘡痱滋赤痛 引致茶飯不思?
米奇醫師@Fitz.hk
Fitz Life 生活

廣告
米奇醫師
一開始踏足社會,就是在香港大學聲線研究所學習何謂「研究精神」。若干年後,膽粗粗帶著此精神在澄明堂私人執業,每天憑著這團火繼續燃燒僅餘青春,慶幸成為熱愛工作的幸運兒。