無良健身中心中伏血淚史

好多朋友平日忙到無時間運動, 想喺office附近join返個gym,又驚俾啲PT sell爆中伏,網上超人氣blogger于日晨早前就喺佢嘅facebook專頁「一日之計在於晨」,分享咗一段慘痛經歷,內容稍長,但絕對值得一讀﹙內含粗口, 慎入﹚

全文如下:

今日同朋友講起做Gym,令我諗返起若干年前因為一個朋友為咗join個試玩plan而篤咗我個名同電話出嚟,之後當然係日日打嚟話有試做價優惠期有限又剩,當年仲係少年太年輕的我諗住500蚊三個月咁抵都一試無妨,話晒自從返咗工之後都冇咩機會做運動,唔join由至可,一join種惡果。依件柒事可以話係我人生入面其中一件黑歷史,講出嚟除咗係因為一吐鬱咗多年嘅怨氣,仲希望大家引以為鑑,唔好受騙。想唔想聽?想聽就繼續碌落去,好長,長過啲客俾錢我寫膳稿十倍!

準備好未?
嚟喇!

話說當年我睇見嗰間健身中心個試做優惠寫住「500蚊三個月任做,絕無額外收費」心諗都ok丫500蚊玩三個月,跑下步舉下啞鈴郁下!於是上去報名講個sales名出嚟諗住拎張試做證試玩,OK咪Join個長plan囉!點知個接待完全冇理我講咩就搵個六呎高嘅大隻佬嚟招呼我:「Hi呀師兄,我叫Alan,依便丫!」Alan,依個名我化咗灰都記得。

「咦有冇帶運動衫嚟?」
「有。」
「換咗衫先,你第一次嚟,我教你做幾嘢先!」
「哦好,唔該你……」

屌依家諗返起我講唔該真係好ON9。Anyway,當年未傳出健身中心極醜惡銷售手法,所以我完全冇防範,加上朋友冇賽後報告,當年一隻迷途小孤羊就咁上咗賊船。換咗衫出嚟,哇又多個大隻佬叫L佛:「嗨我哋會先教你做少少動作,等你可以適當咁運動」教埋我啲低能Sit up、Push up,推下機擘下腿,仲下下數住,深蹲30下一組做5組,逼到我爆晒汗攰到嘔泡,而我又唔知點解咁ON9要聽佢哋點,可能係因為俾兩個大漢牛咁眼望住,有壓力。

「咦師兄,你覺唔覺得自己行路個姿勢有少少偏左?」
「下…係咩?」
「係呀,應該係左邊肌肉唔夠,其實我好多『學生』都係咁!」
「係咩……」
「你嚟做Gym其實係想有D咩帶走?」
「做下運動,健康啲啫……」
「唔唔唔…明白,其實睇返啦,頭先你好多動作都唔夠力喎其實」
「咁…第一次做嘛……」
「第一次做都唔應該咁易腳軟喎!」
「Squat 30下一組,我做足5組喎……」
「咦師兄好似都有D研究喎!」
「以前打校隊都有啲訓練嘅…」
「咁師兄不如同你做個Body check,睇下依家個身體狀況點樣丫!」

嚟到依度,你一定會話理佢都ON9,鬼唔知係焗你入去怒Sell咩?不過我想講,做完50下push up、50下推胸、120下深蹲之後,HP見晒血、意志力仲跌到落腳趾公,我堅唔明點解嗰陣真係會覺得自己係因為唔健康所以唔夠力,而傻的嗎跟咗佢入玻璃房做檢查。磅下重、量下心跳血壓同疑幻疑真嘅脂肪比例之後,Alan就話去Print份報告出黎叫我等一等。一等就45分鐘,間房又凍,我又啱啱爆完汗,cool down咗之後勁凍……意志力幾乎跌到零,此時Alan先拎住兩頁紙斯斯然入返嚟:「喂Sorly呀,頭先有個學生整到,我去幫佢所以遲咗返嚟」屌你 我明明見住你喺出面同幾個教練吹水吹到笑晒!

「師兄你睇!唔足磅、脂肪比唔夠、但係血壓又過高喎!」
「我做完一輪劇烈運動先入嚟body check會唔會唔準?」
「個個學生都咁講,但我同你講一定準!」
「咁…應該點做?」
「頭先睇咗你玩咗少少運動啦,可能太耐冇運動依家都幾生疏喎係嘛?」
「我少推機啫…」
「相信你自己都知自己爭啲咩想要啲咩嘅!」
「其實我真係冇乜要求,純粹想跑下步舉下鐵…」

「拿拿拿咁就錯喇,較為瘦削身形嘅朋友其實盡量唔好跑步,會愈跑愈瘦!我好多學生啱啱過嚟玩都會有依啲誤會,但係日子有功,佢哋依家個個都獨當一面,有兩個仲參加咗今年健美先生比賽。不過我又唔係要你練到好似Batman咁款,其實基本好似我咁已經ok,唔好睇我都算大隻,其實唔難,你肯花時間,你都可以變到我咁!再講丫,邊個唔想高大靚仔?我就唔靚仔喇,但你靚仔嘛,已經煩少咗樣,再齊埋件嘅話,真係殺晒!拿唔好話咩殺晒喇,就咁講話想睇起上嚟健康啲有力啲,唔係話有就有,都要下苦功,不過唔使擔心,我會幫你!只要肯操足三個月,包你型過我!」

「我…淨係得500蚊……」

「錢唔係問題,最緊要係幫到你,自己練一定練唔好,動作唔啱盞side咗時間同錢,再講,依度啲師兄個個都咁大隻,你入到嚟都唔敢玩啦!有我帶住好做好多!拿咁,我計計條數先,假設三個月內完成一個極速訓練,極速嚟講即係依個Advanced Plan,咁就依個價…high speed training嘅話…即係話…每日做兩Part,星期日休息嘅話…OK!依個價應該係最抵!」

「三萬八?我邊有咁多錢……」

「錢唔係問題,最緊要有效果嘛!我好多學生都會做循環貸款,聽佢哋講最高做到你人工八倍,睇師兄你一定唔止搵一萬啦?三萬八做fit個身形,你信我!三個月後你一定覺得物有所值!最緊要係健康嘛!講真丫,我個個學生都話冇時間做運動架啦,所以先嚟跟我操,Bump大啲肌肉,行出街自信都多啲,你睇我隻手臂!拿唔係好大,15吋到啫!摸下,堅料嚟架!」

「阿Alan哥,我可唔可以考慮下先……」

「冇時間考慮啦!你上得嚟就預咗攞返啲嘢走,係咪先?你真係以為自己喱埋做會有效果咩?你做一兩次覺得冇feel就唔做,到最後連嗰啲錢都蝕埋,老實同你講,公司就係靠賺依啲錢,唉我覺得好唔啱,係睇唔過眼先嚟幫你!拿你睇…依個係我學生,你睇佢幾大隻?不過唔講你唔知佢啱啱嚟嗰陣其實肥仔嚟架乍哈哈哈哈哈!跟咗我兩年依家都仲未斷,點解?就係因為有效果囉!」

「但三萬八…真係好貴……」

「錢唔係問題,最緊要有效果嘛!拿你唔使依家一次過俾晒嘅!你依家用credit卡落住一半訂先,其它嗰啲咪用循環貸款囉!我就唔信嗰三萬幾你攞唔到出嚟!信我,三個月後你一定覺得物有所值!講真丫,我個個學生都話冇時間做運動架啦,所以先將個責任跟俾我,我幫佢哋Bump大晒啲肌肉,行出街自信好多,你睇我舊胸肌!拿唔係好大,45吋到啫!摸下,堅揪架!你嚟都係想練好自己個Body啫!」

「其實我真係冇乜要求,純粹想郁下…」

「拿拿拿又錯喇!我好多學生初初嚟嗰陣都係咁諗,但你明唔明白有啲嘢你想得到就要付出架喇!日子有功,你一定有得著!我唔係要你練到好似The rock咁款,基本好似我咁已經ok,唔好睇我咁大隻,其實一啲都唔難!你肯花時間你都可以變到我咁!再講丫,邊個唔想高大靚仔?我就唔靚仔喇,但你靚仔嘛!煩少樣再齊埋件嘅話,不得了!拿唔好話溝唔溝死女,就咁講話想睇起上嚟健康啲有力啲唔係話有就有架,都要下苦功。不過唔使擔心我實磅住你!三個月!包你型過我!」

「Alan哥,我諗我真係要諗下先,依度真係好凍…我因為咁樣而冷親返唔工,我會投訴你哋……」

「唉OK…咁你再考慮下啦。依家等等先,我叫同事過嚟幫你做返張試用證。考慮下啦!最緊要有效果丫嘛傻仔!你睇你!咁瘦一啲霸氣都冇!行路又偏左,咁落去遲早左邊肌肉會萎縮架!街邊嗰啲阿伯行路拐下拐下就係因為咁!你自己諗下啦!連你自己都唔爭氣,仲有邊個幫到你?」

最後我成功得到一張試用證,但惡夢並未因此而遠去。之後每一次都受到同樣嘅硬銷騷擾,每一個教練都會話我動作唔啱、透氣唔夠力、眼神唔夠堅定。我覺得自己就好似大海中嘅一條又肥美又可口嘅魷魚,所有經過嘅大魚都想過嚟吞我落肚。仲有一次我見到兩個教練因為我而爭執,好似小學雞咁:「隻客我湊到先個喎!」「哇 Eric唔係咁講嘢呀嘛?你話係就係?啲Walk客全部歸你好冇?」每一次想靜靜哋做Gym,但每一次都俾人叫入房,每一次都趁我做到攰做到冇氣先入我中路。好煩,好煩,真係好煩,煩到我做到第四次後就冇再去。

唔去就冇事?試玩期即將完結,滿以為可以同依間仆街健身室講拜拜,點知電話開始嚟:「于生,你個會藉就嚟過期喇喎,使唔使幫你續期?依家電話確認,即刻有會員優惠,五年Plan每個月只係三百七十蚊,包埋Locker同毛巾,仲有十張男仕美容護理優惠券!如果簽多三十六個月,每個月仲有九折」五年Plan?即係一次過要俾二萬幾蚊傻的嗎?簽多三十六個月咪即係八年?供樓呀?對當時月薪只有萬二蚊又要還學費又要供保險又要俾家用嘅我嚟講,二萬幾真係一個天文數字!我當然話「唔使喇」、「唔續喇」、「唔好再打嚟喇」回應,你以為咁就趕得走佢?太天真!

佢哋每日都會搵唔同人打嚟,我講咗話「你尋日先打過嚟,都話唔好再打嚟!」佢會話尋日嗰個唔係佢,電腦冇顯示有同事「聯絡」過我。每一日都打嚟打足半年真係痴撚線!連來電轟炸都有Schedule,頭兩個月係問你續唔續約,第三四個月問你有咩意見點解唔續,第五六個月就話有咩超抵優惠唔報執輸,真係煩到一個點會想Dum爆個電話。(相信已經有好多人因為咁而Dum爆咗自己個電話)

我覺得健身界有如此迂腐嘅風氣,或多或少都關政府事。康文署啲健身室少之有少,做之前又要報佢個咩器材班讀,每期又得幾十個位,一公開報名就冇晒籌,屌你!咁樣仲唔完全反映到香港係有幾需要同缺乏公共健身設施?點解唔開多啲出嚟救下我哋依班想健身又唔想去幫襯嗰啲無良健身中心嘅人?淨係識Dum錢起啲垃圾門常開搞門面嘢!

各位想去健身中心嘅手足,依篇警世回憶錄係希望為你長少少知識,就算真係上去報名,都千祈唔好做深蹲,俾人Chok晒啲HP值任人舞!我知你一定會問究竟依間奸商係邊間?唔…費事又俾人恐嚇,只能夠透露少少每次做完Gym,都會去對面間老字號食個完美蛇羹潤腸餐先返屋企,完!

p.s. 神呀,我真係好希望達哥可以幫我讀出嚟,阿們。

原文載於facebook專頁一日之計在於晨

更多:
gym房的宇宙
10大令人討厭的行山行為
Fitz健身文章

分享
張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。