行山遇蛇唔使驚_001

更新日期: 30-9-2017

香港屬於亞熱帶地區,所以蛇嘅品種一啲都唔少,大家行山遇到蛇,其實不足為奇。

根據漁護處統計,香港陸地上嘅毒蛇有12至16種,其中毒性最強包括金腳帶銀腳帶,以及飯鏟頭等。不過,大家其實唔使因為咁而唔去郊外,因為大多數蛇感受到人類,都已經一早掉頭走。

圖片來源: 漁護處

專家教路,行山要避免受到蛇嘅攻擊,可以注意以下幾點:

保持距離

絕大多數情況,蛇如果唔感受到威脅,係唔會主動攻擊人類。喺山徑見到有蛇,先慢慢後退,只要同蛇保持十呎左右嘅距離,就算同佢影下相,打下卡都仲得。不過睇時睇,千祈唔係圍住佢哋,記得要留條路畀佢走。

眼看手勿動

遇到任何野生都動物其實都唔應該觸碰。特別係蛇,你嚇親佢,令佢有反常反應,佢真係話唔定會咬你。

咪扮專家

好多人以為毒蛇顏色鮮艷,但呢個完全係誤解。你唔係蛇類專家,千祈咪段估。好似話寄生喺樹上嘅翠青蛇 (我山雞經常喺麥徑見到佢哋),佢哋嘅樣,同毒性頗強嘅青竹蛇非常近似。青竹蛇就因為全身綠色,好多人以為佢無毒而中招 (平均每年毒死10人)。其實就算證實係無毒嘅蛇,都唔好搞佢哋啦。

圖片來源: 蘋果日報

咪做好心

好多行山友見到山徑有牛屎,或有大石,都鍾意整個標示,或者移開大石,利人利己。呢啲品德固然值得讚揚。但山徑見到有蛇,都唔好做好心移開條蛇,甚至諗住打死佢。都係嗰句,你唔係專家,唔知蛇嘅反應會係點。如見到有蛇有可能威脅其他人,可打999報警。

大家對香港嘅蛇有興趣,亦可睇下片段介紹:

資料來源:漁護署網頁、chitchat.hk


更多:
Fitz Facebook 專頁
[正識山野] 山界謠言—毒蛇
[興烚烚] 炎夏行山救命法寶
山雞其他文章
Fitz Hiking 行山

分享
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。