行山都係為咗放鬆下,睇下靚景,帶咩裝備其實唔使講咩大原則。
行山都係為咗放鬆下,睇下靚景,帶咩裝備其實唔使講咩大原則。

某日,在酒樓飲茶,撞啱一班素未謀面嘅行山前輩同枱。原來呢班伯伯嬸嬸朝早五點幾起步,由馬鞍山行去黃大仙。傾下傾下,見其中有位伯伯個背囊超大,忍唔住問佢放咗啲乜。伯伯就如數家珍咁講佢嘅隨身裝備。裏面除咗一般行山要用嘅嘢外,有幾樣真係有啲估唔到:(附伯伯親口解釋)

1. 收音機連mp3播放機(重點係唔用耳筒):「播音樂用嚟激勵自己,激勵大家丫嘛!」
2. 四呎長樹枝做嘅行山杖:「借力、打狗、趕馬騮、防身,都唔知幾有用!」
3. 乾淨衣服一套:「見到條河忍唔住跳落去玩,都要換衫架!」
4. 兩傘:「遮太陽,遮雨囉。」
5. 摺扇:「撥涼呀!」
6. 廁紙半卷
7. 酒樓送嘅濕紙市N包
8. 茶葉+暖水壼:「去到山頂,一人一啖茶,係咪好嘆先?」
9. 食具、碗筷

去到呢到,伯伯將佢背囊嘅嘢差唔多拎晒出嚟,我亦唔好意思再睇咯。

我問伯伯:「你孭咁多嘢咁重,咁會唔會行得好慢呢?」

伯伯答:「行咁快做乜?行得快,咪睇唔到風景,嘆唔到茶囉?」

伯伯又講得啱,平日返工仲唔夠趕?行山都咁趕,為乜?

行山裝備各有各法,我哋覺得啱用嘅嘢,人哋未必都係咁諗。伯伯行山講享受,講舒服,佢哋覺得滿意就得囉。

更多:
意想不到5件行山裝備
山雞其他文章
Fitz Hiking 行山

分享
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。