13蚊一粒墨魚丸_001
手打墨魚丸(左),油炮鮮墨魚。兩碟加埋盛惠300大元。

facebook群組「樂山行」傳來一張圖片,有行山友山長水遠去到高流灣(西貢塔門對面)食墨魚兩食,每碟盛惠$150大元。有心水清網民,隨即計到,嗰碟墨魚丸每一粒價值13蚊!

至於呢兩碟菜加埋300大洋又合唔合理呢?其他網友就有唔同立場:

「不過咁,我入舖頭食野一定知道價錢先,一個願打一個願挨,而且敢講句市區食唔到咁好味即打墨丸。」

「質素如何就聽天,去到咁遠食大家心中有數!其實很多所謂海鮮和其他食材都是由市區運入,我地都唔好阻人發財啦!」

「呢間我同朋友經常有去食好多人去夏季超多人,通常包一枱食套餐,都有時令诲鲜平均每人百多元,飽住肚走如你散叫實貴因為人地主力做套餐。」

西貢高流灣,通常由黃石碼頭坐船去。
西貢高流灣,通常由黃石碼頭坐船去。

嗱,我山雞都係睇網上評論,真係唔敢立亂下定論。不過我記得喺個幾月前,喺烏蛟騰三椏村嘅餐廳,就聽到幾個打扮成Yama Girl嘅行山美少女嘅對話:

「嘩,乜40蚊碗餐蛋麵,10蚊支汽水咁貴呀?」

「係囉,翠華都唔使咁貴啦。」

「咁你而家肚唔肚餓丫?你肚餓就要食架啦!」

網上搵到一碗聲稱係三椏村士多嘅餐蛋麵。賣相又幾吸引喎。
網上搵到一碗聲稱係三椏村士多嘅餐蛋麵。賣相又幾吸引喎。

嗱,呢個就正正係我幾十年前讀經濟學ABC嘅考試題題目:「7仔一罐可樂賣5蚊,點解去到卡拉OK要賣20蚊?」13蚊一粒墨魚丸,40蚊碗餐蛋麵,咪就係有好多附加價值囉。呢啲價值包括,啲墨魚新鮮啲(心理上啦)、食嘢嘅風景靚啲、行完山個味覺靈敏啲……總之,只要人哋明碼實價,的確係無乜得好拗。

呢幾年唔少社運人士都好痛恨香港嘅所謂市場經濟,但其實呢個Case,如果嶂上許林,或者大帽山蓮姐,佢哋賣一支水,要賣深水埗士多嘅價錢,每支3蚊,咁佢哋仲可唔可以繼續經營落去?

我山雞並唔係話13蚊粒墨魚丸好合理,因為食海鮮我鍾意自己煮。不過行山路過山野士多,我仍然會忍唔住要食番碗餐蛋麵,因為我知道若果嶂上許林執笠,係一定唔會開番間7-11。

13蚊一粒墨魚丸_005
案發地點係咪呢度?我其實認唔出囉。

同場加映:500蚊食一餐
講開山野餐廳,我山雞當年都跟朋友盲舂舂,去到鹿頸吊燈籠山腳一帶某間山野餐廳。因為天黑黑,成班人又顧住傾顧住飲,其實唔係太記得食過啲乜。只係記得嗰餐有幾條魚,幾碟炒菜,仲有煲野豬!(據稱係老闆自己上山打,所以我唔敢開名囉。)咁呢一餐我都唔記得好唔好味,剩係記得老闆每人收我500蚊!我哋一行廿人,即係話老闆單係呢一圍枱嘅營業額就10,000!我唔敢話貴,因為街市都唔會有野豬賣。不過自此之後,我哋成班朋友無人夠膽再去幫襯佢咯。

或者有商人就好識得利用遊客呢個「附加價值」嘅心態,去賺更多錢囉。

更多:
[上山容易] 婆仔上樓級大法
[雨季來臨] 山上野菇不要採
山雞其他文章
Fitz Hiking 行山

分享
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。