跑手CV 唔係唔寫PB吓話_f老友A升職,新官上任,要請秘書,叫我幫手揀人。我心諗,個秘書又唔會幫我做嘢,點解由要我揀?不過睇人哋CV都係好節目,即管睇下先。

一睇之下,仲以為自己睇緊跑步Group,呢位小兄弟,除咗寫咗佢嘅基本學歷,工作經驗,後面仲有一大堆佢跑步嘅歷程,由幾時拎第一隻馬,參賽紀錄,時間幾多,以至PB(Personal Best)同訓練方式都有齊。最搞鬼,係佢附咗幾張RunKeeper嘅Cap圖!

你會唔會CV入面附咗圈圈圖?(網上截圖設計)
你會唔會喺CV入面附埋圈圈圖?(設計圖片)

老友問:「我搵得你,就當然對呢位求職者有興趣。不過我最想知,鍾意跑步嘅人其實有咩特點?做嘢會點樣嘅呢?」

我一直都無認真諗過呢個問題,不過既然被問到,亦可以列出「跑手對工作上的幫助」:

  1. 幾hea嘅跑手必須要經刻苦訓練,工作上刻苦耐勞;
  2. 長跑比賽要有計劃,有部署。工作上會較有條理;
  3. 人生有目標,做人較正面、積極;
  4. 經常運動體內腦內啡長期高水平,做人會樂觀、開心。
  5. 身體健康,病假都請少啲;(嗱,跑到傷晒另計。)
  6. 身體質量好,做體力勞動性工作一定勝任;

當然啦,對公司嚟講,跑手嘅缺點可能係飲(同酙去練跑)嘅蒸磂水比其他同事多,又或者成日用公司個廁所換衫沖身……

呢位跑手CV,令我諗到,所謂「馬拉松選手」呢個身份,真係唔講出嚟,係唔會有人care。

記得第一次跑完全馬,Facebook有人稱我為「馬拉松選手」,開心咗幾日。但之後呢?除咗自己知道之外,「6個鐘內完成馬拉松」呢個成就,就好似同「打孖寶賽車爆機」、「一口氣食5個巨無霸」,甚至「坐過晒全香港巴士線」,根本無甚分別!

Facebook個人資料,都無得揀自己做「馬拉松選手」,連呃like嘅機會都無!

有大企業要指定求職者係毅行者,但我無聽過有老闆要指定請「馬拉松選手」!唔通6個鐘跑42K,簡單得過48個鐘行100K?

咦……我終於明白,點解呢位跑友要喺CV列埋自己跑步嘅成績啦!佢明白,與其在網上呃like,不如爭份工返嚟好過!

更多:
[親子運動] 細路仔做運動唔使逼啩?
家聯其他文章
Fitz Running 跑步

分享
家聯
為何要運動?去公園看看那些四五歲的小朋友,從跑跑跳跳所得來的喜悅吧!勿忘初衷,運動會令人快樂,難道我們都忘記嗎?