圖: 28/12受傷入院,27/1完成HK100,岩岩好一個月時間

剛剛星期六,小弟順利在16小時內完走HK100,得到一眾地球人跑手最憧憬的「小金人」。但呢個「小金人」令我有另一番感受……原來身體健康;食得、行得、跑得,係一件咁幸福既事!

於HK100前一個月,在聖誕節假期完結前,本想準備一下三月尾的「逆走100」。所以就諗著輕鬆啲走一轉「逆走針草帽」(M8-7),本來已經練到合埋眼都識行又安全既「針草帽」,卻差啲令我差啲呢世人都唔洗再行山。

圖: 當天出發前開開心心同蓮姐合照先起步,點估到1個鐘頭後會出事

當天由大帽山出發,同蓮姐 selfie 後就起步。去到鉛礦坳嘅時候,當時我跑緊落山,發現唔到前方原來有5-6隻狗,到睇到嘅時候,佢哋已經向我衝緊過來。其實當時我已經立即停低嘗試喝退佢地,但係佢哋仍然衝過來撲我,我冇選擇之下,唯有繼續向鉛礦坳個亭方向跑落山,由於牠們實在太快 (小弟自問落山都好L快),仲記得當時既畫面其中2隻狗,就在我左右腳邊約半尺距離。當時真係好驚,結果我失足向前仆倒,PK後我中間斷左片,到醒既時候已有幾位行山人士幫我止血 (中間佢地話我失去知覺約10多秒左右),我真係 (x9999) 好感謝佢地,全靠佢地見到我,如果唔係我暈左一個人都唔知會發生D咩事。

圖: 斷片後,甦醒番已有行山人士為我止血,好在有佢地,真係救番我一命

之後幾位行山人士幫我 call 白車送左我入院。幸好啲狗最後無咬到我,其實我自己都養狗,我好明白佢地都唔想傷到人,可能佢地覺得我闖入左佢地既地盤 or 因為我跑緊佢地覺得有攻擊性。Anyway,都已經唔重要。

圖:無左隻牙,個咀爆左,除左灌啲粥落口之外,乜都食唔到,好記得當我十日後,食得番一碗餐蛋面既時候,覺得係如此幸福!

入院後,清醒番少少,但身體手、腳、腰…等多處損傷。由於當時向前PK,最慘面落地先,塊面損晒,撞親個頭,無左隻牙,個咀爆左,右手指骨折……而家諗番都覺得恐怖。訓左幾日醫院,再回家休養,足足食左9-10日全粥餐,其他野乜都食唔到,又要日日洗傷口……當時,以為自己應該有排抖。諗著渣馬、HK100 都唔會玩到……當時都有啲灰!

From: HK Trail Running Facebook –Jon Lee 圖: 原來我出事前1-2日已經有人係附近俾該5-6隻狗追

但好好彩,康復進度比想像中理想,而且最不幸中之大幸,係除左手指骨折外,其他都只係皮外傷,沒有傷及其他跟骨,身體機能是正常,最重要既係對腳無事。去到渣馬前,皮外傷已經好得7788,所以決定照去跑渣馬10K。如果感覺良好,HK100 就去馬。結果都順利完成,雖然狀態,速耐,肌力…….等等都真係仲爭啲,但 overall 係感覺良好,I’m ready for HK100!

圖: 雖然同PB仲差一段距離…….但跑番呢個時間都算係咁

出事前,其實自己都有目標希望可以衝擊14-14.5小時內完成。但出事之後,我都只係抱著安全完成既心態去玩 HK100 (其實內心深深處係—我要小金人!) 。而係養傷期間,發現原來當意外發生係自己身上既時候~ 原來健健康康,可以食得、行得、跑得……唔係一件理所當然既事 don’t take it for granted (真心話)。

Photo credit: Jenny Liu 圖: 放鬆心情,享受比賽,往往都有意想不到的發揮

比賽當日,大致都十分順利,除左手指骨折未好番,用唔到 Pole,所以就全程用腳,就當練定4月份既UTMF (*UTMF 環富士山越野賽,規定參賽者不可使用行山杖,以保護富士山山徑完整)。

Photo credit: Yorick Tam 圖: 有人問做乜張張相都係伸脷? 唉,因為我無左隻牙囉!

但可能因為太耐無做強度訓練,左膝去到30K左右有啲唔舒服,再加上之前出事撞甩左隻牙,開始牙肉痛。幸好非苦隊友俾左粒 Arcoxia 我,令我舒緩不少。

Photo credit: Isaac Wong 圖: 全靠非苦 support team 提供豪華級支援服務…….(其實俾人叫我唔好再坐,趕走中….)

最後,係一流既天氣,一流既氣氛,再加上有「非苦」各兄弟姐妹最貼心既 support 下。以最輕鬆既心情,放開時間/目標既束縛下,最終小弟以14小時48分鐘完成 HK100,成功帶到「小金人」番屋企。

Photo credit: Jenny Liu 圖: 最後4公里見有機會衝擊 sub 15hrs,結果用4分幾披由波頂衝落山,衢線後人都散晒!

最後最後,係度希望我既分享可以令大家明白 ~~~ 原來身體健康,並唔係理所當然既事,大家要好好珍惜。

Photo credit: Isaac Wong 圖: 出事剛剛好一個月後……再見番蓮姐!
Photo credit: Jenny Liu 圖: 感謝大佬由我出事,不停出入醫院,日夜照顧我到好番……呢個小金人你都有份


更多:
Fitz Facebook專頁
[與神同行] 世界冠軍陪我跑 – François D’haene
燒鴨價錢 燒鵝味道 Salomon Sense Ride
[大脾罅救星] 從未如此舒適的短褲仔
[越野跑鞋的GTR] Salomon S-Lab Sense Ultra
[潮流興玩帽] 識襯一定係襯「佢」 (Bike Cap)
[有毒慎入] 識玩,一定要帶女友去玩呢個 (前篇)
[怯~你就輸了!] 一對踏上大賽頒獎台的地球人
壞人 Ryan@Fitz
Fitz Running 跑步

廣告
壞人Ryan
八十後,現職某大型連鎖店之營運經理,自2011 首次參與毅行者後,漸漸愛上越野跑。參加過大大小小之香港路賽,山賽 (凡人一名)。講究裝備,正宗『裝備L』 一名。 堅持屎波都要架生多。同時亦熱愛足球, 死忠曼聯迷。